ტრენინგები პროექტის "ახალგაზრდების დასაქმებისა და ბიზნეს უნარების განვითარება" ფარგლებში ჩატარდა, რომელიც "მშვიდობის კორპუსის პარტნიორობის პროგრამის" (PCPP) მხარდაჭერით ხორციელდება. პროექტი 13-კვირიანი სასწავლო მოდულისგან შედგებოდა, რომლის ფარგლებშიც მოზარდებმა კარიერის დაგეგმვისა და დასაქმებისთვის საჭირო უნარ-ჩვევები შეიძინეს. ორი მოდული კი, კონკრეტულად ფინანსური წიგნიერების საკითხებს დაეთმო.
პირველ ტრენინგზე ეროვნული ბანკის სპეციალისტებმა "ბილიკის" ბენეფიციარებთან ერთად ახალგაზრდებისთვის მნიშვნელოვანი ისეთი ფინანსური საკითხები განიხილეს, როგორიცაა - ფულის მართვა, გონივრული გადაწყვეტილებების მიღება, დაზოგვა, ფინანსური პროდუქტები და ფინანსური უსაფრთხოება. მონაწილეები აქტიურად იყვნენ ჩართულები დისკუსიასა და ჯგუფურ აქტივობებში.
მეორე ტრენინგზე კი მონაწილეებმა უკვე ფინანსურ ორგანიზაციებთან ურთიერთობის, გონივრული სესხების, მომხმარებელთა უფლებებისა და პასუხისმგებლობების შესახებ იმსჯელეს. ტრენინგების დასასრულს, მოზარდებმა აღნიშნეს, რომ შეხვედრებზე მიღებული ინფორმაცია მათ ყოველდღიურ ცხოვრებაში სწორი ფინანსური გადაწყვეტილებების მიღებაში დაეხმარება.
"ახალგაზრდა თაობის ფინანსური განათლება ჩვენი ქვეყნისთვის მნიშვნელოვანი გამოწვევა და ეროვნული ბანკის ერთ-ერთი პრიორიტეტული მიმართულებაა. ჩვენ დაინტერესებულ მხარეებთან ერთად ვცდილობთ, სხვადასხვა პროექტის განხორციელების გზით, გავაღრმავოთ ახალგაზრდების ინტერესი ფინანსური წიგნიერების მიმართ. გვსურს, მადლობა გადავუხადოთ საზოგადოება "ბილიკს" ამ პროექტში ჩვენი ჩართულობისთვის", - განაცხადა საქართველოს ეროვნული ბანკის მომხმარებელთა უფლებების დაცვისა და ფინანსური განათლების დეპარტამენტის უფროსმა, ლაშა გზირიშვილმა.
ფოტო გალერეა
