ყველა შინაურ ცხოველს განსხვავებული მოვლა და საცხოვრებელი პირობები ესაჭიროება. ზოგს გარეთ ხშირი გაყვანა და თამაში სჭირდება, ზოგს კი გალიის ყოველდღიური დასუფთავება. სანამ კონკრეტულ ცხოველს სახლში ახალი ბინადრის სტატუსით მიიყვანთ, გაითვალისწინეთ მათი მოვლის და მოთხოვნილებების თავისებურებანი, დაფიქრდით თქვენი ცხოვრების სტილიდან, ფინანსური შესაძლებლობებიდან და საყოფაცხოვრებო პირობებიდან გამომდინარე, რამდენად შეგიძლიათ შეუქმნათ თქვენს შინაურ ცხოველს საჭირო საცხოვრებელი პირობები, დაუთმოთ მათ მოვლა-პატრონობას საკმარისი დრო, გამოყოთ თქვენი ან ოჯახის ბიუჯეტიდან შესაბამისი ხარჯები.

კატა

ნაკლები დროითი რესურსის გამოყოფაა საჭირო კატასთან ერთად ცხოვრებისათვის. არც ძალიან ბევრი სივრცის დათმობა მოგიწევთ მისთვის.

კატები უფრო დამოუკიდებლები არიან, შეიძლება საერთოდ არ შეგაწუხონ თავისი არსებობით, თუმცა მათაც სჭირდებათ ყურადღება, თამაში და მოფერება. აქაც გასათვალისწინებელია, რომ სახლის გარკვეული ავეჯი შესაძლოა კატებმა თავისი ბრჭყალების გასალესად გამოიყენონ. 

თევზები

თევზებს დიდი სივრცე არ სჭირდებათ,  ისინი არც დიდ დროს მოითხოვენ მეპატრონისგან. აკვარიუმში მოთავსებული ფერად-ფერადი თევზები სახლს ძალიან ალამაზებენ. მართალია, კატის ან ძაღლის მსგავსად, მათს ჩახუტებას და მოფერებას ვერ მოახერხებთ, თუმცა თამაში თევზებმაც იციან. ისინი დროთა განმავლობაში ეჩვევიან იმ ადამიანს, რომელიც მათ კვებავს და ამას გარკვეულ მოძრაობებითაც გამოხატავენ, როცა მათ ხედავენ. ფსიქოლოგების აზრით, თევზები დადებითად მოქმედებენ ადამიანის ნერვულ სისტემაზე, ამშვიდებენ და განტვირთვის ერთ-ერთ საშუალებას წარმოადგენენ. აკვარიუმი ის ერთადერთი სივრცეა, რაც თევზებს ესაჭიროებათ ცხოვრებისთვის. 

ძაღლი

ძაღლებს სათამაშოდ და სამოძრაოდ სივრცე სჭირდებათ. ძაღლის ჯიშიდან გამომდინარე, ზოგ მათგანს უფრო მეტი, ზოგს კი ნაკლები სივრცე აკმაყოფილებს. ამიტომ თუ კორპუსის მაცხოვრებელი ბრძანდებით, ძაღლის ყოლა თქვენთვის უფრო მეტ გამოწვევასთან იქნება დაკავშირებული, ვიდრე იმ შემთხვევაში, თუ კერძო სახლში ცხოვრობთ ანუ ძაღლისთვის მეტწილად სუფთა ჰაერზე ყოფნა და მეტი სათამაშო სივრცის შეთავაზება შეგიძლიათ. ძაღლი, ასევე, მოითხოვს თავისუფალ დროს მისი მეპატრონისგან მასთან ერთად სასეირნოდ, ან უბრალოდ სათამაშოდ. გაითვალისწინეთ და იმისთვისაც მზად იყავით, რომ, შესაძლოა, თქვენმა ოთხფეხა მეგობარმა თამაშ-თამაშით თქვენთვის ძვირფასი ფეხსაცმელი ან ავეჯი დაგიზიანოთ.

მღრღნელები (ზაზუნა,ზღვის გოჭი) და კურდღელი

მღრღნელების ყოლისთვის თქვენი მხრიდან არც დიდი სივრცეა საჭირო, არც ბევრი თავისუფალი დრო. კურდღელი სასურველია უფრო მოზრდილ გალიაში მოათავსოთ,  მღრღნელების გალიასთან შედარებით. ამ ცხოველების მოვლისთვისაც არც იმდენი ფინანსური ხარჯის გაწევა მოგიწევთ, რამდენიც კატაზე ან ძაღლზე. აუცილებელია, პერიოდულად დაუთმოთ დრო მათი გალიის დასუფთავებას. 

 

ფრინველები

ჩიტების მოვლა დიდ სიძნელეს არ წარმოადგენს. ისინი გალიაში ცხოვრობენ, შესაბამისად არ საჭიროებენ სახლში დიდი სივრცის გამოყოფას.

მათი უმრავლესობა ჭკვიანი, მგრძნობიარე და ხალისიანია, სწორედ ამიტომ ისინი ადამიანის შესანიშნავი მეგობრები არიან ხოლმე, განსაკუთრებით კი თუთიყუშები. ფრინველების გალიაც აუცილებლად საჭიროებს პერიოდულ დასუფთავებას. მზად უნდა იყოთ ასევე ფრინველის ბუმბულისა და საკვებისგან გალიის გარშემო პერიმეტრის დასუფთავებისთვის.