ზოგადი რჩევები მასწავლებლებს ფინანსური განათლების ინტერაქტიული გაკვეთილების დასაგეგმად:

რჩევა 1: შეარჩიეთ თქვენი მოსწავლეების ასაკობრივ ჯგუფზე მორგებული თემა

მოსწავლეებისთვის ფინანსური წიგნიერების საკითხების სწავლება უფრო საინტერესოა, როდესაც ისინი კავშირს ხედავენ თავიანთ ყოველდღიურობასთან. ამიტომ შეარჩიეთ შესაბამისი თემა: ჯიბის ფულის მართვა, საყიდლების დაგეგმვა, დაზოგვა პირადი მიზნებისთვის, ფინანსური თაღლითობების თავიდან არიდება და ა.შ.

რჩევა 2: განსაზღვრეთ გაკვეთილის მკაფიო მიზანი და მისაღწევი შედეგები

და გააცანით მოსწავლეებს, რათა როგორც თქვენ, ისე მათაც გააზრებულად იმუშაონ გაკვეთილზე. მაგალითად, გაკვეთილის ბოლოსთვის მისაღწევი შედეგები შეიძლება იყოს: მოსწავლეს შეუძლია პირადი ბიუჯეტის შედგენა, მოსწავლემ იცის, როგორ შეიძლება დაზოგოს თანხა მიზნის მისაღწევად და ა.შ. 

რჩევა 3: გამოიყენეთ ინტერაქტიული მეთოდები

დისკუსია, როლური თამაშები, სიმულაციები, სიტუაციების ანალიზი, პროექტები - ის აქტივობებია, რომელიც მოსწავლეს მისცემს გაკვეთილზე ჩართვის, აღმოჩენისა და კვლევის საშუალებას. მაგალითად: ბაზრის სიმულაცია - სადაც ნახავენ როგორ განისაზღვრება ფასები, ბიუჯეტის დაგეგმვა სკოლის კონკრეტული პროექტისთვის და ა.შ.

რჩევა 4: მოარგეთ სწავლება მოსწავლეების ასაკობრივ ჯგუფს

არამხოლოდ თემა, არამედ სწავლების მეთოდებიც და რესურსებიც შეარჩიეთ ასაკისა და გამოცდილების მიხედვით, მაგალითად, დაწყებითი კლასის მოსწავლეებისთვის მარტივი თამაშები, მეხსიერების ბარათები, ზღაპრები/ამბები, ხოლო უფროსკლასელებისთვის შედარებით რთული თამაშები, სიმულაციები, ნამდვილი სიტუაციების ანალიზი და ა.შ.

რჩევა 5: წაახალისეთ დამოუკიდებელი ფიქრი და გადაწყვეტილებების მიღება

გამოიყენეთ აქტივობები, სადაც მოსწავლეებს მოუწევთ შეაფასონ ალტერნატივები და მიიღონ ინფორმირებული ფინანსური გადაწყვეტილება, მაგალითად, საკუთარი ხარჯების გადანაწილება, დაზოგვის გეგმის შექმნა, ფინანსური უსაფრთხოების გეგმის შექმნა, ფასების შედარება, სხვადასხვა ბანკის შემოთავაზების ერთმანეთთან შედარება და ა.შ. 

რჩევა 6: ჩართეთ მშობლები საგანმანათლებლო პროცესში

მიაწოდეთ მშობლებს ინფორმაცია ფინანსური განათლების მნიშვნელობისა და სახლში გასაკეთებელი აქტივობების შესახებ, მაგალითად, ოჯახის ბიუჯეტის შედგენა, საყიდლების სიის შექმნაში მონაწილეობის მიღება, მნიშვნელოვანი ფინანსური გადაწყვეტილებების მიღების პროცესზე დაკვირვება და ა.შ.

რჩევა 7: არ დაგავიწყდეთ (თვით)შეფასება

მნიშვნელოვანია პროგრესის გაზომვა როგორც თავად მოსწავლეების მიერ - მაგალითად, რა აღმოაჩინეს ახალი, რამ დააინტერესათ, რის შესახებ უნდათ მეტის გაგება, ასევე მასწავლებლის მიერაც - როგორც თეორიული ცოდნის შეფასებით, ასევე პრაქტიკული სავარჯიშოებითაც - მაგალითად, სკოლის ღონისძიების ბიუჯეტის შედგენა.