დამსაქმებელთან სამუშაო პირობებზე შეთანხმებისა და ახალი სამსახურის დაწყების გადაწყვეტილებას მიღების შემდეგ, მნიშვნელოვანია, ახალ გარემოსთან შესახვედრად მოემზადოთ. ცნობილია, რომ ახალი ადამიანები, ახალი საქმე და პასუხისმგებლობები გარკვეულ სტრესორს წარმოადგენს. ამიტომ უმჯობესია, გარკვეული საკითხები წინასწარ დაგეგმოთ, რათა შეგუების პერიოდმა შედარებით მარტივად ჩაიაროს.

სამსახურში გასვლამდე დაისვენეთ 

ახალი სამსახურისთვის მზადება ხშირად თავისუფალ დროსთან თუ ძველ ცხოვრებასთან „გამოთხოვებით“ იწყება. სამსახურის წინა დღეების დატვირთვა გართობით და დამღლელი აქტივობებით არასწორია. დაღლილობამ, ნაბახუსევმა ან არაკონცენტრირებულობამ, შესაძლოა ახალ კოლეგებთან არასასურველი შთაბეჭდილების შექმნაში დიდი როლი ითამაშოს. იმისთვის, რომ მოემზადოთ ახალი გამოწვევებისთვის, სამსახურის დაწყების წინა დღეებში ნუ დაგეგმავთ წვეულებებს, ლაშქრობას და დრო დასვენებასა და ძალების აღდგენას დაუთმეთ .

ეს საკითხი განსაკუთრებით მნიშვნელოვანია, თუ თქვენ არსებულ სამსახურს იცვლით და ახალ გარემოში გადადიხართ. დასვენება გჭირდებათ იმისთვის, რომ გამოეთიშოთ ყოველდღიურ რუტინას და მზად იყოთ ახალი გამოწვევებისთვის. თუ თქვენი განრიგი გაძლევთ საშუალებას, დასვენებისთვის 1 კვირა მაინც აიღეთ, თუ დროში შეზღუდული ხართ, მშვიდი უქმეებიც დაგეხმარებათ ძალების აღდგენაში. 

მოემზადეთ წინა დღით

პირველი დღე ახალ სამსახურში ბევრ ფიქრთან და საზრუნავთანაა დაკავშირებული. იმისთვის, რომ ახალი სამუშაო დღის დილა ზედმეტად დატვირთული არ გამოგივიდეთ, შეეცადეთ, რისი მომზადებაც წინასწარ შეიძლება, წინა დღით მოიმზადოთ. მაგალითად, მოაწესრიგეთ ტანისამოსი, გაიმზადეთ ლანჩი და შეინახეთ შესაბამის კონტეინერში, რომ დილით მის მომზადებაში დრო არ დაკარგოთ.

მზად იყავით მსუბუქი საუბრებისთვის პირველ სამუშაო დღეს

ახალი სამსახურის პირველი დღე შეიძლება დატვირთული იყოს სხვადასხვა ტექნიკური საკითხის მოგვარებით. ეს ნიშნავს, რომ სანამ თქვენი სამუშაო სივრცე ბოლომდე აღიჭურვება, თქვენ გექნებათ დრო, გაეცნოთ თანამშრომლებს და მათთან პირველი კონტაქტი დაამყაროთ. ხშირად, ახალი თანამშრომლებისთვის რთული ხდება საუბრის დაწყება იმ მიზეზით, რომ მათ ძირითადად, არ იციან, რა ინტერესების სფერო აქვს კონკრეტულ ადამიანს. ამ სიტუაციასთან გასამკლავებლად, რეკომენდებულია  წინასწარ მოამზადოთ მსუბუქი, ნეიტრალური თემები, რომელზე საუბარსაც თავისუფალ დროს შეძლებთ.

იყავით პუნქტუალური

პირველი შთაბეჭდილება, რომელსაც დატოვებთ ახალ გარემოზე, საკმაოდ მნიშვნელოვანი იქნება. პირველი ეფექტი  სამსახურში დროულად გამოცხადებითაც იქმნება. ეცადეთ, იყოთ პუნქტუალური. სამუშაო ადგილზე დათქმულ დროს გამოცხადდით. ასე თქვენ გამოხატავთ თქვენს დამოკიდებულებას ახალი საქმის მიმართ, ამასთან, ეს იქნება პატივისცემის გამოხატულება კოლეგებისა და მათი დროისადმი. შეიძლება მოხდეს ისეც, რომ თქვენგან დამოუკიდებელი მიზეზების გამო ვერ მიხვიდეთ სამუშაო ადგილზე დათქმულ დროს (მაგალითად, გზაზე ავარიული სიტუაცია, რამაც გამოიწვია მოძრაობის შეჩერება), ამ შემთხვევაში უმჯობესია, არ დააყოვნოთ და შესაბამის პირს სატელეფონო ზარის საშუალებით აუხსნათ შექმნილი ვითარება და დაასახელოთ სამუშაოზე გამოცხადების სავარაუდო დრო. 

აღიჭურვეთ სამუშაოსთვის საჭირო მინიმალური ნივთების კომპლექტით, როცა არ იცით რა დაგხვდებათ სამსახურში

თქვენი სამუშაოს პირველ დღეებში საჭირო ნივთების მობილიზებას დრო დასჭირდება, ამიტომ უმჯობესია თუ თან იქონიებთ საჭირო ნივთების მინიმალურ ჩამონათვალს მაინც, რომლებიც სამუშაოს შესრულებაში დაგეხმარებათ. მაგალითად, ასეთი შეიძლება იყოს: რვეული ჩანაწერებისთვის, კალამი, სტიკერები, რომელიც მნიშვნელოვანი ინფორმაციის დამახსოვრებაში დაგეხმარებათ და სხვა.

შესაბამისად ჩაიცვით

შეეცადეთ სამსახურში გასვლამდე გაარკვიოთ ორგანიზაციაში მიღებული ჩაცმის სტილი. ეს დაგეხმარებათ, კომფორტულად იგრძნოთ თავი სამუშაოს პირველივე დღეს და თავიდან აიცილოთ შეუსაბამო ჩაცმულობით გამოწვეული დისკომფორტი.

ეცადეთ გაცნობილი თანამშრომლების  ვინაობა კარგად დაიმახსოვროთ

იმისთვის რომ ადვილად მოძებნოთ საჭირო ადამიანი, ასევე გაგიმარტივდეთ თანამშრომლებთან კომუნიკაცია, უმჯობესია, თუ შეეცდებით მომავალი კოლეგების ვინაობის სწრაფად დამახსოვრებას.  თუ კოლეგების რაოდენობა არც ისე ცოტაა, ყველას ერთბაშად დამახსოვრება, არც ისე მარტივი ამოცანა გამოდის, მაგრამ ამისთვის შეიძლება გამოიყენოთ მათი სახელის მანიშნებლები, სოციალური ქსელის პროფილები, ნებისმიერი სხვა დამხმარე მიმანიშნებელი, რაც კოლეგების ადვილად იდენტიფიცირებისა და დამახსოვრების საშუალებას მოგცემთ.

მოიძიეთ ინფორმაცია კომპანიაზე 

მნიშვნელოვანია, მინიმალურ ინფორმაციას მაინც ფლობდეთ იმ კომპანიაზე, რომელშიც სამუშაოდ მიდიხართ. ეს საკითხი აქტუალურია არა მარტო უკვე მუშაობის დაწყების, არამედ გასაუბრებაზე მისვლის დროსაც. მნიშვნელოვანია, რომ თქვენი დაინტერესება ორგანიზაციის მიმართ ეყრდნობოდეს ფაქტებს, რასაც ამ კომპანიაზე ფლობთ, ასე უფრო მეტი სანდოობით ისარგებლებთ გასაუბრებაზე და მარტივადაც წამოიწყებთ საუბარს ახალ კოლეგებთანაც.

ღიად ესაუბრეთ უშუალო ხელმძღვანელს თქვენს სამსახურეობრივ ფუნქცია-მოვალეობებზე

მნიშვნელოვანია, თქვენი უშუალო ფუნქცია-მოვალეობები დააზუსტოთ უშუალო ხელმძღვანელთან. ვინაიდან თქვენი საქმიანობის შემფასებელი ხელმძღვანელია, მნიშვნელოვანია, რომ თქვენ მიმართ არსებული მოლოდინები უშუალოდ მისგან მოისმინოთ. ამავდროულად მნიშვნელოვანია, დასვათ ყველა შეკითხვა, რათა გაგიმარტივდეთ სიტუაციის აღქმა და სამუშაოს შესრულება.

მაქსიმალურად გამოიყენეთ თქვენი უნარები

იმისთვის, რომ ახალ გარემოში წარმატების მიღწევა შეძლოთ, არ დაიშუროთ ძალისხმევა და მაქსიმალურად აჩვენეთ თქვენი უნარები. გარემო, სადაც მიდიხართ, ძირითადად, დაკომპლექტებული იქნება ისეთი ადამიანებით, რომლებმაც ერთმანეთის შესაძლებლობები კარგად იციან და ნდობაც ჩამოყალიბებული აქვთ. ამ გარემოში სწრაფი ადაპტაციისთვის უმჯობესია, თუ ბოლომდე დაიხარჯებით და თქვენი შესაძლებლობების მაქსიმუმს გამოავლენთ.

გადახედეთ სამსახურისთვის საჭირო მასალას

იმისთვის, რომ ახალი სამუშაოსთვის შეძლებისდაგვარად მზად იყოთ, სასურველია წინასწარ გადახედოთ მასალებს, რაზე მუშაობაც მოგიწევთ. ეს დაგეხმარებათ სწორი შთაბეჭდილება შეიქმნათ სამუშაო სპეციფიკაზე.

ისარგებლეთ კომპანიის მიერ შემოთავაზებული დამატებითი სარგებლით

გარდა ხელფასისა, ხშირად ორგანიზაციები თავის თანამშრომლებს სთავაზობენ სხვადასხვა ტიპის სარგებელს კორპორატიული შეთავაზებების სახით. როგორც წესი, ასე არა მარტო სხვადასხვა მომსახურების ხელმისაწვდომ ფასად მიღების საშუალება გეძლევათ, არამედ ეს კარგი გზაა იმ სოციუმთან დასაახლოებლად, რომელშიც მუშაობთ.

უწყვეტი შემოსავლის მიღებისთანავე დაიწყეთ დაზოგვა

ის, რაც სამუშაოს დაწყების პირველივე დღიდან უნდა გააცნობიეროთ, ეს არის დაზოგვის აუცილებლობა, მაშინ როდესაც უწყვეტი შემოსავლის წყარო გაგიჩნდათ. დაზოგვა შეიძლება ნებისმიერი შემოსავლის პირობებში, თუმცა, როდესაც შემოსავალი უწყვეტია და მისი დაგეგმვა უკეთ შეგიძლიათ, აუცილებელია შეადგინოთ გეგმა ანუ ბიუჯეტი  და დაიწყოთ დაზოგვა. 

ის თუ სამსახურთან დაკავშირებული რომელი ფაქტორი გახდება პრიორიტეტული, იკვეთება მაშინ, როდესაც თქვენ არჩევანს აკეთებთ სხვადასხვა ალტერნატივას შორის. ალტერნატივებზე დაფიქრება შესაძლოა, მოგიწიოთ მაშინ, როცა სამსახურს აქტიურად ეძებთ ან როდესაც უკვე დასაქმებული ხართ და ახალ შემოთავაზებას ღებულობთ. ნებისმიერ შემთხვევაში,  თქვენ მოგიწევთ, გააანალიზოთ როგორც თითოეული შეთავაზება ინდივიდუალურად, ასევე, შეადაროთ ისინი ერთმანეთს და თქვენთვის ყველაზე ხელსაყრელი გადაწყვეტილება მიიღოთ.