კატეგორიები

ნავიგაცია

ჩემი ფინანსური მეგზური

მოგზაურობის ფინანსური ნიუანსები

მოგზაურობისას ფინანსური მხარე ერთ-ერთი მნიშვნელოვანი საკითხია. თქვენ დაგჭირდებათ მოგზაურობის ხარჯების განსაზღვრა, ბიუჯეტის შედგენა და გარკვეული თანხის დაზოგვაც. თუმცა მანამ, სანამ თვითმფრინავის ბორტზე ფეხს შედგამდეთ, კიდევ არის რამდენიმე დეტალი, რომლის წინასწარ გათვალისწინებაც ჯობია იმისთვის, რომ მოგზაურობით სრულფასოვნად დატკბეთ და ფინანსური საკითხები აღარ გაღელვებდეთ:

კონვერტაცია

უცხო ქვეყანაში მოგზაურობისას, ცხადია, ამ ქვეყნის ვალუტა დაგჭირდებათ. წინასწარ გასარკვევია, როგორ და სად შეძლებთ ამ ვალუტის ყიდვას. არსებობს კონვერტაციის ორი გზა: ნაღდი და უნაღდო სახით. მაგალითად, ნაღდი ფულის შემთხვევაში, გასარკვევია, შესაძლებელია თუ არა ლარით უცხო ქვეყანაში იყიდოთ ამ ქვეყნის ვალუტა? ან შესაძლებელია თუ არა, საქართველოში, ლარით იყიდოთ სხვა ქვეყნის ვალუტა? მაგალითად, ევრო ან აშშ დოლარი შეგიძლიათ საქართველოშივე მარტივად იყიდოთ ლარით, ასევე, შესაძლებელია მაგალითად, გირვანქა სტერლინგის, შვეიცარული ფრანკის, თურქული ლირას, რუსული რუბლის, აზერბაიჯანული მანათის და ზოგიერთი სხვა ვალუტის ყიდვა. დანარჩენი ვალუტის შემთხვევაში, კი დიდი ალბათობით, ორმაგი კონვერტაცია მოგიწევთ:

მაგალითად, თუ ჩეხეთში მიემგზავრებით, ლარით საქართველოში უნდა შეიძინოთ დოლარი ან ევრო და შემდეგ, ადგილზე, დოლარით ან ევროთი  შეიძინოთ ჩეხური კრონა. უნაღდო კონვერტაციის შემთხვევაში კი პროცესი უფრო მოსახერხებელია: თქვენ უბრალოდ ათავსებთ  ბარათზე თანხას ლარში, ხოლო უცხო ქვეყანაში გადახდისას, თანხა ავტომატურად დაკონვერტირდება შესაბამის ვალუტაში. ასევე შესაძლებელია, უცხო ქვეყანაში ყოფნისას, ბანკომატით გაანაღდოთ თანხა ამ ქვეყნის ვალუტაში, კონვერტაცია აქაც ავტომატურად მოხდება თქვენი ანგარიშიდან.  თუმცა გასათვალისწინებელია, რომ ასეთ შემთხვევებში კურსი შეიძლება, შედარებით მაღალი იყოს, დამატებით, თანხის განაღდებისას კი - ჩამოგეჭრათ განაღდების საკომისიო, რომელიც ასევე, გაცილებით მაღალია, ვიდრე თანხის მომსახურე ბანკის ბანკომატში განაღდება. 

გადახდის მეთოდი

განსაზღვრეთ, რა მეთოდით გადაიხდით: ბარათით, თუ ნაღდი ფულით. როგორც წესი, საერთაშორისო ბარათები, VISA და MasterCard ყველგან გამოიყენება ანგარიშსწორებისას, ამასთან, ბარათზე თანხის განთავსება უფრო უსაფრთხოა, ვიდრე ნაღდი თანხით მოგზაურობა. თუმცა ზოგიერთ შემთხვევაში, შესაძლებელია ნაღდი თანხაც დაგჭირდეთ, მაგალითად, „ჩაის“ დატოვებისას, ტაქსით მგზავრობისას, ქუჩაში სუვენირის შეძენისას და ა.შ.  ამიტომ თანხის ნაწილი იქონიეთ ნაღდი სახით. 

გამგზავრებამდე მოამზადეთ ბარათი: წინასწარ იყიდეთ იმ ქვეყნის ვალუტა, სადაც მოგზაურობას აპირებთ და განათავსეთ თანხა ამ ვალუტის ანგარიშზე. (თუ ამ ვალუტის ანგარიშის გახსნა შესაძლებელია).როგორც წესი, ბანკები უცხოური ვალუტებიდან ყველაზე ხშირად გვთავაზობენ ანგარიშებს დოლარსა და ევროში.  ამასთან, ბანკში დააზუსტეთ, ხომ არ არის საჭირო, შეცვალოთ ანგარიშებს შორის პრიორიტეტულობა, იმისათვის, რომ ამ ვალუტაში განხორციელებული ოპერაციების შესაბამისი თანხა შესაბამისი ვალუტის ანგარიშიდანვე ჩამოიჭრას და არა სხვა ანგარიშიდან კონვერტაციის გზით.  თუ მოგზაურობის ქვეყანაში ისეთი ტიპის ვალუტა გამოიყენება, რომელსაც უნაღდო სახით ანგარიშზე ვერ განათავსებთ (მაგალითად, უნგრეთში მოგზაურობისას როდესაც უნგრული ფორინტი გჭირდებათ), გაითვალისწინეთ, რომ ბარათით ანგარიშსწორებისას მისი კონვერტაცია პრიორიტეტული/ძირითადი ანგარიშის ვალუტიდან (ლარის, ან სხვა ვალუტის) განხორციელდება. 

ბარათით სარგებლობის შემთხვევაში, ასევე გასათვალისწინებელია, რამდენია ბარათიდან განაღდების დღიური ლიმიტი და განაღდების საკომისიო. როგორც წესი, საზღვარგარეთ თანხის განაღდება მინიმუმ 2%-ია. რაც შეეხება განაღდების ლიმიტებს, განსხვავდება ბანკებისა და ბარათების კლასის მიხედვით. როგორც წესი, მაღალი კლასის ბარათებს განაღდების უფრო მაღალი ლიმიტი აქვთ. 

დაბოლოს, წაიღეთ დამატებითი ბარათიც - იმ შემთხევაში, თუკი ერთი ბარათი დაკარგეთ ან მოგპარეს და მისი დაბლოკვა მოგიწიათ. 

ინტერნეტბანკი

იმისათვის, რომ სხვადასხვა საბანკო ოპერაციების განხორციელება და თქვენი ანგარიშების კონტროლი საზღვარგარეთაც შეძლოთ, კარგი იდეაა ინტერნეტბანკის გამოყენება. თუ ორდონიანი აუთენთიფიკაციით სარგებლობთ, რაც ინტერნეტბანკში შესასვლელად დამატებით, კოდის მობილურის ნომერზე მოსვლას გულისხმობს, ან მაგალითად, გადარიცხვის განხორციელებისას ავტორიზაციის კოდი მობილურის ნომერზე მოგდით, დარწმუნდით, რომ ეს ნომერი ჩართული გექნებათ საზღვარგარეთ მოგზაურობისას, რათა არ შეფერხდეთ ტრანზაქციების განხორციელებისას. 

ამასთან, წინასწარ იზრუნეთ მომავალ გადასახადებზე, იქნება ეს კომუნალურები თუ სესხის შენატანი, რათა მოგზაურობისას არ იფიქროთ მათზე. განათავსეთ საკმარისი თანხა თქვენს ანგარიშზე. სესხის შემთხვევაში, როგორც წესი, შენატანი ავტომატურად ჩამოიჭრება თქვენი ანგარიშიდან, კომუნალურების გადასახდელად კი შეგიძლიათ ავტომატური გადარიცხვის სერვისი გააქტიუროთ, რომელიც ავტომატურად გადარიცხავს თანხას თქვენი აბონენტის ანგარიშზე.

დაზღვევა

ჯანმრთელობის სამოგზაურო დაზღვევა სავალდებულოა ევროკავშირში მოგზაურობისთვის, ასევე, როგორც წესი, საჭიროა სხვა ქვეყნის ვიზის მოსაპოვებლადაც. მიუხედავად იმისა, სარგებლობთ თუ არა ჯანმრთელობის დაზღვევით, ცალკე სამოგზაურო დაზღვევის შეძენა აუცილებელია და ამისთვის შეგიძლიათ თქვენთვის სასურველ სადაზღვევო კომპანიას მიმართოთ.

თუმცა, სამოგზაურო დაზღვევა არ არის მხოლოდ ფორმალობა, რომელიც საზღვრის გადასაკვეთად  საჭირო დოკუმენტების ჩამონათვალში შედის, რადგან საზღვარგარეთ ავადმყოფობის შემთხვევაში, მკურნალობა შეიძლება საკმაოდ ძვირი დაგიჯდეთ, სამოგზაურო დაზღვევის არსებობისას კი ეს ხარჯი შეგიმცირდებათ ან არ გექნებათ, ამიტომ კარგად გაარკვიეთ, რას ითვალისწინებს თქვენი სამოგზაურო დაზღვევა, რა შემთხვევებს ანაზღაურებს და რა ლიმიტის ფარგლებში. დამატებით, თქვენ ასევე შეგიძლიათ დააზღვიოთ ბარგის დაკარგვისა თუ რეისის გადადების რისკები, რაც ნიშნავს, რომ ბარგის დაკარგვის, ან რეისის გაუქმების შემთხვევაში თქვენს ზარალს წინასწარ შეთახმებული ლიმიტის ფარგლებში სადაზღვევო კომპანია აანაზღაურებს. იხილეთ მეტი სამოგზაურო დაზღვევის შესახებ.

ბანკისთვის შეტყობინება

გამგზავრებამდე აცნობეთ ბანკს/ბარათის გამცემს, რომელ ქვეყანაში და როდის აპირებთ მოგზაურობას. რადგან, უსაფრთხოების გამო, ბანკმა/ბარათის გამცემმა შეიძლება დაბლოკოს ბარათი, თუ საზღვარგარეთ განხორციელებული ოპერაციები საეჭვოდ მიიჩნია.