ფინედუ მეწარმე ქალთა გაძლიერების პროექტში ჩაერთო

26-28 ივლისს ფინედუ მიკროსაფინანსო ორგანიზაცია „კრისტალის“ ქალთა გაძლიერების პროექტში ჩაერთო. კრისტალი 20 წელზე მეტია რეგიონებში მცხოვრებ მეწარმე ქალებსა და სათემო ლიდერებს ქალთა ეკონომიკური და პიროვნული გაძლიერების სხვადასხვა პროექტსა და ინიციატივას სთავაზობს. ამ კონკრეტულ სტრატეგიულ შეხვედრაში მონაწილე ქალები სამ დღიანი ინტენსიური სალექციო სესიებისა და პრაქტიკული შემეცნებითი აქტივობებით იღებდნენ მათზე მორგებულ ცოდნასა და ინფორმაციას. განსახილველი თემები კი ფინანსურ ცნობიერებას, დაზოგვას, გენდერულ კოგნიტურ მიკერძოებასა და სათემო აქტივობებს შეეხებოდა.

აღსანიშნავია, რომ საქართველოს ეროვნული ბანკის ფინანსური განათლების ეროვნულ სტრატეგიაში ერთ-ერთ ძირითად სამიზნე სეგმენტს ქალები, მეწარმეები და რეგიონში მცხოვრები მოსახლეობა წარმოადგენს.  შესაბამისად, „კრისტალის“ ქალთა გაძლიერების პროექტში სების ფინანსური განათლების განყოფილებაც ჩაერთო. ფინედუს თანამშრომელმა, მონაწილეებს გააცნო ეროვნული ბანკის საქმიანობა და ფუნქციები, ასევე ისაუბრა დაზოგვის აუცილებლობასა და მიზნობრიობაზე. მონაწილეებს დაურიგდათ ბროშურები ფინანსური განათლების შესახებ. 

ფინედუ მომავალშიც აქტიურად განაგრძობს პარტნიორი ორგანიზაციების მხარდაჭერას და სტრატეგიული სეგმენტებისთვის საჭირო ცოდნისა და რესურსების მიწოდებას.